байыастарга көмө уонна өйөбүл оҥорор сыаллаах-соруктаах уонча киһилээх бөлөҕө үс күннээх сырыытын-айанын кулун тутар 17 күнүттэн Чурапчыттан саҕалаата.

Буорах сытын билбит боотурдар институкка тиийээттэрин кытта истиҥ көрсүһүү, төгүрүк остуол тэрилиннэ. Бырайыак ааптара эбии үөрэхтээһин факультетын декана Марианна Манасытова “Проект реабилитационного десанта для участников СВО “Открывая горизонты: реабилитационно-образовательный маршрут” киэҥ ис хоһоонноох программатын билиһиннэрдэ. Институт ректора Иннокентий Готовцев, институт президенэ Михаил Гуляев, проректордар Евгений Коркин, Вячеслав Лонгинов, Иван Лукин 2022 сылтан институкка тэриллибит байыаннай патриотическай кулууп салайааччыта, СВО кыттыылаахтарыгар көмөнү оҥорууну, институт олоҕун, үөрэтэр үлэтин, инники кэскилин, реабилитациялыыр десант сүрүн-сыалын соругун кэпсээтилэр.

Чуолаан, Иннокентий Готовцев - СВО кыттыылаахтара институкка үөрэххэ киириэхтэрин сөбүн, чэпчэтиилэр (льготалар) баалларын, АБДь бэтэрээннэрин оҕолоро үөрэнэ сылдьалларын, госпиталларга эмтэнэ сытар байыастарга уонна сэриилэһэ сылдьааччыларга материальнай уонна гуманитарнай көмөлөр оҥоһуллалларын; саҕаламмыт бырайыак түмүгүнэн инники туох дьаһаллара ылыллаллара тутулуктааҕын; СВО бэтэрээннэрэ дьон-сэргэ, нэһилиэнньэ иннигэр улахан эппиэтинэстээх миссияны толорууга саҕалааччыларынан буолалларын;

Михаил Гуляев – СВО бэтэрээннэрэ өйдөрүн-санааларын дьайҕардан, эттэрин-сииннэрин чөллөрүгэр түһүүлэригэр, десант сырыыта-айана туһалаах, көдьүүстээх, бастакы саҕалааһыны олоххо киллэриигэ сүрүн күүс буолалларыгар эрэнэрин биллэрдэ, ситиһиини баҕарда.

Сарсыардаттан саҕаламмыт программа киэҥ, дириҥ ис хоһоонноох буолла.

Арчы балаҕаныгар Россия эмчиттэрин үтүөрдээччи-волонтердара Мария Божедонова-Сэгэлдьийэ, Анисия Беляева сахалыы сиэринэн-туомунан аал-уот оттон, сылгы сиэлинэн сыт таһааран, буруолатан, алаадьынан, кымыһынан, саламаатынан күндүлээн алҕаатылар.

“Боотур Уус” стадиоҥҥа баар кыһыҥҥы тииргэ буулдьанан ытыыга маастар-кылаастары институт спорка отделын салайааччыта Василий Давыдов, “Азия оҕолоро” Оонньуулар чөмпүйүөнэ, Дальнай Восток, Сибиир уонна Бүтүн Россиятааҕы турнирдар кыайыылааҕа, Россия спордун маастара, тренер Роман Аржаков ыыттылар. СВО кыттыылаахтарын ортолоругар ыытыллыбыт “ВП-10” буулдьанан ытыыга күрэхтэһиигэ Дмитрий Лукин, Алексей Уваров, Сергей Подоксенов, туһааннааҕынан, бастакы, иккис, үһүс миэстэлэри ылаттаатылар, өйдөбүнньүк мэтээллэринэн, дипломнарынан наҕараадаланнылар.

Институт научнай лабораториятыгар доруобуйаларын үөрэтэр-чинчийэр отдел сэбиэдиссэйэ Клавдия Сивцева, методист Ньургун Келин, специалист Мария Яковлева көрдөрбүттэригэр, бэйэлэриттэн 10-15 сыл аҕа сааһы көрдөрөн туруктара мөлтөөн сылдьарын, уйулҕа хамсааһына баара билиннэ. Сэрии содула улахан. Эрчимнээх курдук санана сылдьар байыастар бэйэлэрэ да улаханнык соһуйдулар. Уруккуларын курдук чөллөрүгэр түһэргэ сүбэ-ама ыллылар. Төбөлөрө быгар итии паарынан үрэр “кедровай” буочукаҕа олордулар, саунаҕа эттэрин-сииннэрин сымнатан чэбдигирдилэр. Орто-профессиональнай үөрэхтээһин факультетын декана, Москватааҕы РГУФК бүтэрбит наука кандидата, үрдүк категориялаах массажист, травматолог Эдуард Павлович Федоров, институт 4-с куурсун студена Дьулустаан Харитонов хас биирдии байыаска биирдии чаас комбинированнай илбийиилэри оҥордулар.

Үлэ чааһын кэнниттэн, киэһээ, саха аһыгар норуот маастара, VI разрядтаах технолог-повар, Бүтүн Россиятааҕы уонна Саха Өрөспүүббүлүкэтин куонкурустарын кыайыылааҕа Клара Петровна Кондратьева тотоойу, иҥэмтэлээх сахалыы астаах-үөллээх сандалыны күндү ыалдьыттарга тардан күндүлээтэ.

Истиҥ кэпсэтии, санаа атастаһыыта болҕомтону ылла. Десаны тэрийбит институт үлэһиттэригэр, СВО бэтэрээннэригэр өйөбүллэрин, тотоойутук аһаппыттары иһин махталларын биллэрдилэр. Өрдөөҕүтэ Чечня сэриитигэр кыттыбыт, кэлин, АБДь-га бараары “Боотур” киинигэр киирэн дьарыктаммыт, контрагын болдьоҕо бүтэн дойдутугар эргиллибит Анатолий Митин -“Хатан” (Чурапчы, Чакыр), СВО-ҕа барарга анал үөрэҕи ааспыт, эт-сиин, өй-санаа, уйулҕа өттүнэн толору бэлэмнээх ыччат-дьон барыахтарын сөбүгэр санаатын кытта үллэһиннэ. Петр Антонов – “Юрист” (Горнай, Орто-Сурт) былырыын муус устарга алта ыйга контракт баттаһан баран уоттаах сэриигэ кыттан этэҥҥэ эргиллэн кэлбит. Улуустааҕы Аҕа дойдуну көмүскээччилэр кэмитиэтин салайааччыта Сергей Атласов чугас алтыһыы, билсиһии, көрсүһүүлэр, дьаһаллар туһалаахтарын, ыытыллар үлэ инникилээҕин, тэнийэн, сайдан иһэригэр эрэнэрин, бииргэ сулууспалаабыт табаарыһын көрсөн үөрбүтүн туһунан эттэ. Олох-дьаһах коммунальнай хаһаайыстыбаҕа үлэлии сылдьан СВО-ҕа мобилизацияланан ыҥырыллыбыт Алексей Уваров (Таатта, Ытык-Күөл) миинэни үктээн атаҕар ыарахан эчэйиини ылан эрдэ эргиллибит. Анатолий Манасытов (Чурапчы) институт научнай лабораторията доруобуйатыгар кэккэ итэҕэстэри булан, “стресстэн” буолуон сөбүн быһаарда. Институкка бастакы кууруска үөрэнэр Василий Лукин (Чурапчы) биир күн иһигэр ыытыллыбыт элбэх дьаһаллар “уһугуннарбыттарын”, биири да көтүппэтэҕин, барыларыгар кыттыбытын махтанна. Сергей Подоксенов – Тургун (Горнай) СВО-ҕа алта ый баран кэлбитин, өссө бараары сылдьарын, буолуталаабыт дьһаллары сөбүлээбитин эттэ, махтанна.

Бары өттүнэн толору хааччыллыылаах, институт студеннарын уопсайдарыгар түһэн астына-дуоһуйа сынньаннылар. Аны Таатта нэһилиэктэригэр сырыы-айан күүтэр.

Күннэтэ үүнэ-сайда, чэчирии турар дойдуга соҕотох тыа сирин институтугар ыччаттар тустарыгар кыһамньылаах, үлэҕэ баҕалаах, баай идеялардаах дьон үлэлииллэр. Гражданскай ытык иэстэринэн толорон кэлбит боотурдарбытыгар, дьиэ-кэргэттэригэр, уҕараабат болҕомтолорун уурар бэртээхэй бырайыак салҕанар аналлаах.

Баһылай Посельскай