Россия үөрэнээччилэрин икки төгүллээх чөмпүйүөнэ, оҕолорго ССРС чөмпүйүөнэ, ССРС ыччаттарын чемпионатын уонна Али Алиев норуоттар икки ардыларынааҕы турнирын үрүҥ көмүс призера, Дальнай Восток уонна Сибиир икки төгүллээх чөмпүйүөнэ, Саха АССР икки төгүллээх чөмпүйүөнэ, Хабаровскайдааҕы физкультура институтун бүтэрбит тренер, Россия физическэй культураҕа уонна спорка туйгуна, Саха Өрөспүүбүлүкэтин Президенин уонна Бырабыыталыстыбатын Грамоталарынан наҕараадаламмыт, Саха Өрөспүүбүлүкэтин ФКС үтүөлээх үлэһитэ, Чурапчы оройуонун, Арыылаах уонна Чурапчы нэһилиэктэрин бочуоттаах олохтооҕо. Чурапчы оҕо спортоскуолатыгар дириэктэрдээбитэ. Сааһыран истэҕин аайы айар-тутар дьоҕура арыллан иһэр. Оһуохайдьыт, тойуксут, алгысчыт, көҥүл тустууга ССРС спордун маастара Сэмэн Сэмэнэбис Морфунов олоҕун устата 76 төгүл Саҥа Дьыллары көрүстэ, саҥа сыллар ааннарын аан-бастаан аһар. Туһугар, бэйэтэ туспа дьикти, сэдэх көстүү.

Коркин бэйэтинэн ылбыта

Морфуновтар халыҥ аймахтар. Аҕа дойду Улуу сэриитин фронтовик-буойуна, сылгыһыт аҕалара Сэмэн Уйбаанабыс Германияны бүтүннүү хааман, Японияны босхолоһон, төрөөбүт алааһыгар Чурапчы Арыылааҕар эргиллэн иһэн, аара, Мэҥэ-Хаҥалас 2-с Холгума нэһилиэгин Бөдьөлөк бөһүөлэгэр тохтообута. Сэрии огдообото, ыанньыксыт Анна Давыдовна Соловьевалыын холбоһоннор, ыал буолбуттара. Түөрт оҕоломмуттара. Улахан уоллара Сеня 1950 с. тохсунньу 1 күнүгэр төрөөбүтэ. Эһэлэрэ ыарытыйан, 1960 с. Арыылаахха көһөн кэлбиттэрэ. Сеня начаалынай кылааһы Арыылаахха бүтэрэн, Кытаанаххха үөрэҕин салҕаабыта.

Ааспыт үйэ 50-с сылларын бүтүүлэригэр, 60-с сыллар саҕаланыыларыгар Дмитрий Петрович Коркин Одьулууҥҥа, Чурапчы оскуола-интэринээтигэр уонна Чурапчы орто оскуолатын базатыгар тустуу секцияларын аһан общественнай тренер быһыытынан оскуола оҕолорун уонна ыччаттары тустуунан дьарыктаабыта. Чурапчы орто оскуолатын дириэктэрэ Гаврил Дмитриевич Ефимов, үөрэх салаатын сэбиэдиссэйэ Гаврил Гаврильевич Кардашевскай уонна партия оройуоннааҕы кэмитиэтин 1-кы сэкэрэтээрэ Илья Павлович Листиков туруорсууларынан оҕо спортивнай оскуолата аһыллыбыта. Өрөспүүбүлүкэ үөрэҕин миниистирэ Николай Иванович Шарин Чурапчыга оҕо спортоскуолатын тэрийэр туһунан бирикээскэ илии баттаабыта. Спортоскуола дириэктэринэн Алексей Спиридонович Шадрин, тустуу тренеринэн Дмитрий Петрович Коркин анаммыттара.

1964 с. күһүн үөрэх дьыла саҕаланыытыгар тустуу тренерэ Д.П. Коркин оҕолору спортоскуолаҕа хомуйар кэмэ. Дойдутугар Кытаанах оскуолатыгар кэлэ сылдьыбыта. Оскуола дириэктэрэ Лука Афанасьевич Дьяконов кэбиниэтигэр тустууга дьоҕурдаах уолаттары уолаттары биир-биир ыҥыртаан кэпсэппитэ. Сеня Морфуновка “дьоҥҥун билэбин, аҕаҕын кытта бииргэ үөрэммиппит, тустар үһүгүн, оҕолору кыайар үһүгүн, эйиигин спортивнай оскуолаҕа киллэриэм этэ” диэбит. Онтон сөбүлүү көрбүт оҕолору кытта таһырдьа тахсыбыттар. “С” буукуба курдук оскуола тэлгэһэтигэр төбүрүөннээн турар оҕолору хардарыта эргитэ сылдьан көрүтэлээбит, илиилэрин-атахтарын былчыҥнарын туппахтаабыт, кымаахтаталаабыт. Мэник-тэник Сеня “Айка, доо!”,- диэн соһуйбут, тилигирии түспүт. Аны, тренер оҕолору кытта үтэн-анньан тустубуттар. Сеня уочарата кэлэн тутуһуу буолбут. Коркин уолу илиититтэн тардыалаабыт. Сеня ылбыт да атаҕар “сып” гыммыт, биир атаҕын бобо кууһан охтороору тииһэн турбут. Дмитрий Петрович күлбүт уонна “тохтоо-тохтоо, сөп буолуо” диэн мадьыктаһа сылдьар уолу тохтоппут. Сеня уоскуйан кэннин хайыһан көрбүтэ оскуола түннүктэрэ бүтүннүү сирэй, кылааһын оҕолоро кинилэри көрөн күлэ-үөрэ аҕай тураллар эбит.

Чурапчы спортоскуолатыгар уһаарыллыы

Николай Сивцев Россия оҕолоругар чөмпүйүөннээн кэлбит кэмэ. Оскуола биллэр-көстөр спортсменнара Вячеслав Карпов, теннисчит Альбина Поисеева, Харлампий Турнин, Макаров Бүөккэ, Лыткин Сэргэй, Кеша Ермолаев оскуоланы бүтэрээри сылдьаллара, бары үрдүкү кылаастарга үөрэнэллэрэ. Сеня Морфунов, Гоша Местников, Ганя Макаров биһиги 6-с “Б” кылааспытыгар ылыллыбыттара. Бииргэ үөрэммиппит. Көннөрү мочоолоһон тэҥҥэ тустар буоларбыт да, Морфуновтан дохсунуттан толломмут чугаһаабат этибит. Тустуук уолаттар сотору кэминэн, лаппа кыаҕырбыттара, күүһүрбүттэрэ. Тутуспат буолбуппут. Маастарга кандидаты, маастары толорбуттара. Гражданскай сэрии саҕанааҕы “ШКМ” (школа коммунистической молодежи) оскуолатын фойе-көрүдүөрүгэр дьарыктаналлара.

Эрдэ Россия “Урожайыгар” оҕолорго уонна ыччаттарга чөмпүйүөннээбит, ССРС Хотугу Морфолотун чөмпүйүөнэ Николай Барашков уоппускатыгар кэлэ сылдьан балтын быыһаары ууга былдьаммыта. Барыбыт сүрэхпит бааһа буолан умнуллубат. Д.П. Коркин тустууга араскылара түргэнник үүнэн тахсыбыттара. Нөҥүө сайыныгар Вячеслав Карпов оҕолорго ССРС чөмпүйүөнүнэн буолан кэлбитэ.

Тренердэрэ Д.П. Коркин 1964 сыл сэтинньи ыйыгар Токиотааҕы олимпийскай оонньуулары суруналыыс И.С. Кычкин, СГУ преподавателэ В.П. Кочнев буоланнар турист быһыытынан баран көрбүттэрэ. Кэлэн дьоппуоннар тустууларын туһунан кэпсээн, оскуола оҕолоро Ватанабэ, Иотаке, Иосида ааттарын уостарыттан түһэрбэт буолбуппут. Дьарыктарга аан дойду бөҕөстөрүн албастарын көрдөрүү, быһаарыы, кыралыын-улаханныын сэҥээрии бөҕө. “Бөтүрүөбүс” дьарыктыырыгар дьоппуоннар туран эрэ тустууларын үөрэтэрэ. “Атахтааһыннар”, “ныроктар”, бросковай приемнар”, атахтаан көтөҕөн быраҕыылар, “переводтар” тустуук оҕолор үгүстүк туттар албастарынан буолбуттара. Сатыырга, таба оҥорорго кыһаллаллара. Ол биллэн турар улахан үлэнэн, сыранан ситиһиллэрэ. “Омук тустууктара, ордук кавказтар, күүстэрин утары түргэнник хамсаныылары, сымса буолууну, ныроктары”, икки атахха киириилэри, эмискэ-эмискэ тоҕута түһүүнү ситиһэргэ” дьулуһаллара. Ити албастары күрэхтэһиилэргэ хото тутталлара. Оҕолорго сахаттан аан дойду бастакы чөмпүйүөнэ Илларион Федосеев 1968 с. ССРС-ка бастыырыгар финалга утарсааччытын атаҕын икки ардынан соһуччу тахсан, очко ылан кыайбыта. Историяҕа тиһиллэр кыайыыны Федосеев чаҕылханныы түргэн хамсаныыта быһаарбыта.

Чурапчыга тэлгэммит өрөспүүбүлүкэ көбүөрдэригэр Семен Морфунов кулгаах тостуулаах, хаан тохтуулаах хабараан хапсыһыылары көрдөртүүрэ. Абытай тустуулар буолаллара. Биир дойдулаахтарын үөрдүбүтэ элбэх. Харса-хабыра суоҕунан, кимээһиннээҕинэн сураҕырара.

Бөҕө удьуордар

Сеня Морфунов спортивнай оскуолаҕа ылыллан, тыаттан кэлбит оҕолору кытта Чурапчы орто оскуолатын интэринээтигэр олорбута. Маҥнай утаа, аймахтарыгар Василий Егорович, Дария Шестаковтарга түспүтэ. Уоллара Прокопий кэлин ССРС уолаттарын чөмпүйүөнээбитэ. Тоҕоос көстүбүччэ билиһиннэрдэххэ, биллиилээх бөҕөстөр – оҕолорго ССРС чөмпүйүөнэ, “Олимпийскай эрэллэр”, норуоттар икки ардыларынааҕы элбэх турнирдар кыайыылааҕа Прокопий Шестаков, ССРС, Европа, Үтүө Дьулуур оонньууларын чөмпүйүөнэ Василий Гоголев уонна Морфуновтар эт-хаан аймахтыылар. Дуобакка аан дойду чөмпүйүөҥкэтэ, гроссмейстер Наталья Шестакова аҕатын эдьиийинэн сиэннэрэ. Намынан, Үөһээ Бүлүүнэн Морфуновтар удьуордара олохсуйан киэҥник тэнийэллэр.

Күүстээх удьуордар. Ол да иһин буолуо үс бырааттыы Морфуновтар биллиилээх тустууктар. Михаил ССРС ыччаттарын призера, ССРС уонна РСФСР тыатын сирин спартакиадаларын чөмпүйүөнэ, призера. 8-с кылааска үөрэнэр сиэнэ Уруйдаан Д.П. Коркин аатынан Чурапчы спортивнай оскуола-интэринээтигэр үөрэнэр. Читаҕа Дальнай Восток күрэхтэһиитигэр туста сылдьар. Иннокентий Бүтүн Сойуустааҕы турнирдар кыайыылааҕа, оҕолорго аан дойду чемпионатыгар бэһис миэстэлээх. Сиэнэ Михаил Дальнай Восток ыччаттарын чемпионатыгар тустуоҕа. Эдэр тустуукка ситиһиини баҕарабыт!

Аҕалара Сэмэн Уйбаанабыс Морфунов күнүгэр сылдьан мөккүһэн баран 70 киилэлээх бурдугу сүгэн биэрэстэ аҥаара сиргэ баар дьиэтигэр тиэрпит. Аттары айааһааһынынан дьарыктанара. “Морфун” диэн иннигэр хайа да бэйэлээх сылгыны түһэрбэт сүүрүк аттааҕа үһү. Таайын Карл Герсимович Соловьеву “уол оҕото этэ” диэн киэн тутта үчүгэйдик өйдүүр-саныыр. Биллиилээх спортсмен, ырыаһыт Аркадий Михайлович Алексеев чугас доҕоро-атаһа. Оройуон киинэтин тэрилтэтигэр дириэктэрдиир кэмигэр Үлэ Кыһыл Знамятынан наҕараадаламмыттара. Нуучча кыыһын ойох ылан бааһынай оҕолордоохтор, сиэннэрдээхтэр. Атах оонньуутун маастара, күүстээх “куобахчыт” Владимир Рожков ийэтинэн аймаҕа. Морфуновтар икки өттүттэн бэйэлэрин кыанар удьуор бөҕө дьон.

Айар-тутар үлэ үөһүгэр

Д.П. Коркины кытта тренердиир сылларыгар норуоттар икки ардыларынааҕы кылаастаах спорт маастардарын Егор Алексеевы, Михаил Протопоповы, ССРС 20-чэ маастардарын, Россия чөмпүйүөннэрин, призердарын таһаартаабыта. Спортивнай оскуола-интэринээт дириэктэрин М.Д. Гуляевы хаһаайыстыбаннай үлэҕэ солбуйааччынан үлэлиир кэмигэр тустууга аналлаах икки спортсааланы, “Дабаан” спорт лааҕырын, уон массыына турар гарааһын, спорт албан аатын музейын, учууталлар олорор уопсай дьиэлэрин, колледж, институт үөрэнэр корпустарын, Арыылаах нэһилиэгэр баһылыктыыр сылларыгар спортсааланы туттарбыта, бырааттыы Семен, Михаил, Иннокентий Морфуновтар ааттара иҥэриллибитэ. Улуус киин бөһүөлэгэр Новгородовтааҕы уокуругар баһылыктыы олорон культурнай-спортивнай комплексы көҕүлэһэн туттартаабыта.

Оҕо спортоскуолатыгар дириэктэрдиир кэмигэр оҕолор өрөспүүбүлүкэ, Дальнай Восток, Россия чөмпүйүөннэринэн, призердарынан буолуталаабыттара, маастардар иитиллэн тахсыбыттара, сайыҥҥы спорт лааҕырдара үлэлээбиттэрэ. Иитиллээччилэрин ортолоруттан Саха Өрөспүүбүлүкэтин үтүөлээх тренердэрэ М.С. Скрябин, М.М. Каженкин, И.М. Сысолятин, К.Н. Захаров, П.С. Иванов, ССРС сүүмэрдэммит хамаандатын массажиһа Г.А. Троев, сумоҕа аан дойду үрүҥ көмүс призера, Орто-Халыма баһылыга Е.М. Слепцов, Россия чөмпүйүөнэ Василий Алексеев тахсыталаабыттара.

Сүбэлэр, баҕа санаалар

Тустуу көбүөрүгэр үгүс көлөһүнүн тохпут Семен Морфунов сүбэтэ-амата элбэх: “Тустуу мөлтөөтө дии-диибит ытыыбыт-соҥубут да, көрдөрүүлэр бааллар. Европа чөмпүйүөннэрэ, аан дойду призердара, норуоттар икки ардыларынааҕы турнирдар кыайыылаахтара, Россия призердара бааллар. Бааллар. Ол гынан баран өссө баар буолуо этилэр. Биһи сахалар 57, 61 кг тустар ыйааһыммыт. Итинтэн үрдүк да ыйааһыннарга уолаттарбыт тахсан эрэллэр. Оччолорго даҕаны биһигини кавказтар күүстэринэн баһыйар буоланнар, түргэнник тустарга Дмитрий Петрович үөрэппит методиката билигин барыан сөп диибин. “Переводтары” эҥиннэри оҥортоон. Санныгынан тайана түстэххинэ туох барыстааҕый диэн өйдөбүлгэ киирдэххэ, киһи турар “центр тяжести” таһаарарга быдан табыгастаах буолар.

Тобугуттан аллара бэрбээкэйгэ түһэн улуу Сайтиев тустарын тутта сатыыллар. Ити гынан баран, урукку биһи кэммитигэр быраабыланан тустууга Сайтиевы өр туһуннарыа суоҕа этилэр. Тоҕо диэтэххэ, наар “голеностобу” эрийэн , против сустава үлэлээн дьону кыайталыыр. Ону билигин тустуу быраабылата көҥүллүүр. Сайтиев онон кыайталаан-кыайталаан кэллэҕэ дии. Урут ининник киһи бэрбээкэйин эрийэри тохтотоллор этэ. Инньэ гынан ити хамсаныыны туттубат этибит. Тобукатан аллара атахтааһыны биһи практически оҥорбот этибит. Дмитрий Петрович ону бобор этэ. Умса түһэн атахтааһыны, тобуктаан атахтааһыны Андросов Володяҕа эрэ көҥүллүүрэ. Андросов Володя бэйэтэ тустар стииллээх, дьикти-дьиибэ сытан эрэ атахтаан, эриллэн-буруллан тахсар тустуук этэ. Инньэ гынан, утарсааччыларыгар кыайтарбат, онон оҕонньор көҥүллүүрэ. Биһи буоллаҕына тобуктаан түстэхпитинэ, маат таһыгар тахсан тобуктаан диирэ.

Методиката суүрдээх судургу гынан баран, саха тустуутугар барар үчүгэй тустууну айан таһаарбыта. Үөрэппит уолаттара итинник хабааннаахтык тусталлар. Кыайаллара. Кэлин, куоракка киирэн үөрэппит уолаттара “международник” буолтара. Ыччаттарга аан дойду чөмпүйүөннэрэ бааллар.

Тыа сиригэр тустар оҕо аҕыйаата. Урут биһи көлүөнэ “хара” үлэнэн хамсаан-имсээн сылдьыбыппыт. Ол иһин урукку ыччаттар сып-сап курдук хамсаналлара, эттээх-сииннээх буолаллара. Билигин оҕо структурата уһаан, илиитэ-атаҕа синньээн, “взрывной” хаачыстыбалаах оҕо аҕыйах. Тустууга “базовайы бэлэмниир ыарахан буолла.

Дмитрий Петрович үөрэҕи күүскэ биэрэрэ. Тустууну үчүгэйдик туруорара. 1967 с. куоракка “Матч городов” буолбут күрэхтэһии кэнниттэн күүстээх Казахстан хамаандатын кэпсэтэн, Чурапчыга таһаарбыта. Улахан тустуу тэриллибитэ. Аатырбыт Амангельды Габсаттаров, Аманжол Бугубаев, Абильсен Айханов, маастардар бааллара. Биир киэһэ тустууга биһи, Чурапчы уолаттара, күннээбиппит. Кыайталаатыбыт аҕай. Бугубаев Николай Захаров-Сахааччалыын тэҥнэспитэ. Абытайдаах киирсии этэ. Онуска үөрэнэр Сахаачча кыайтарбатаҕа. Андросов Володялаах маастардары кыайталаабыттара. Мин Улугбеков уонна Ахматалиев диэн икки маастары кыайбытым. ССРС-ка 4-5 миэстэлээх уолаттар этэ. Ол кэнниттэн Куоркун уолаттар Саха сиригэр “хаардыы хаама” сылдьыьбыттара. Андросов, Захаров улахан дьону кыайталаабыттара. “Бум” бөҕө, көтөҕүллүү бөҕө буолбута. Соҕуруу бардыбыт да хайаан да миэстэлэһэн кэлэллэрэ. Түөрт-биэс уолаттар бараннар хаачыстыбалаах соҕустук тустан кэлэллэрэ. Кавказка сбордарга сылдьаммыт наһаа баттаппат этибит. Дмитрий Петрович этэр этэ: “сбор” кэмигэр “отрабокаларга” көбүөргэ кыайтараргытын көрдөрүө суохтааххыт” диэн. Оннук күрэхтэһии былааннаахтык сборданарбыт.

Саха тустуута наһаа хаалла диэн ытыыр-соҥуур наадата суох. Тренердэргэ “индивидуальнай” үлэлэр наадалар. Дмитрий Петрович 20 да оҕону дьарыктыы сылдьан биирдиилээн оҕолорго хайаан даҕаны сорудах биэрэрэ. Үлэлэтэрэ. Инньэ гынан, кини дьарыгар сылдьар көдьүүстээх буолара. Соҕурууттан сбортан кэлэн кыдьыгыра-кыдьыгыра дьарыктанар буоларбыт. Үрдүбүтүгэр түсүһэн, иһирдьэ муостаҕа буоллун, таһырдьа хонууга-хаарга буоллун туста-бырахса сылдьар буоларбыт. Тустуу эппитигэр-хааммытыгар оннук иҥэн хаалара. Чөмпүйүөн уолаттар ытыктаналлара, убаастаналлара. 1976 сыллаах Олимпийскай оонньууларга кыттыбыт ССРС хамаандатыттан үһүө эрэ хааллылар биһи уолаттарбыт Павел Пинигин, Александр Иванов уонна тренердэрэ Юрий Шахмурадов. Олимпиада геройдара өрө тутуллуохтаахтар. Оҥорбут үтүөлэрэ умнуллуо суохтаахтар.

Саха тустуутун таһаарбыт дьонунан Н.Н. Тарскайы, тренердэрбитин Н.Н. Волковы уонна Д.П. Коркины ааттыыбын. Өйбүтүгэр-санаабытыгар бааллар. Дмитрий Петрович уолаттарыгар наһаа кыһаллар этэ. Усулуобуйаны барытын тэрийэрэ, ирдиирэ. Ирдиирэ барыта хараҕыттан саҕыллан тахсара. Мөҕөр да буоллаҕына уһуннук этэн-саҥаран сордообот буолара, биирдии-иккилии тылынан төбөҕөр хатанар гына этэрэ. Сүрдээҕин ылынарбыт, ытыктыырбыт, убаастыырбыт. Оччолорго оройуоммут салалтатыттан, И.П. Листиковтан, Р.Р. Бурнашевта нсаҕалаан, РОНО сэбиэдиссэйдэрэ, оскуола дириэктэрдэрэ, колхоз бэрэссэдээтэллэрэ, совхоз дириэктэрдэрэ, дьон барыта, оҕоҕо-дьахтарга тиийэ бары тустууну таптыыллара, ыалдьаллара, үчүгэйдик сыһыаннаһаллара. Илии тутуһан дорооболостохторуна наһаа үөрэрбит. Ону түһэн биэрбэт туһугар тустар этибит”.

Тойуксут, оһуохайдьыт, алгысчыт

“Төбөлөөх, толкуйдаах” киһи үчүгэйдик тустар дииллэрэ Сэмэн Сэмэнэбискэ сөрү-сөп түбэһэр. Эчэйиини ылбатаҕа буоллар, бөҕөс быһыытынан ыраатыахтаах этэ. Өйдөөх-төйдөөх, уус-уран тыл маастара буолара эдэр саастарыттан биллибитэ. Оҕо эрдэҕиттэн мөккүстэҕинэ хайа да бэйэлээххэ иннин биэрбэт, кырдьыгын таһаарынар буолара. Хабаровскайдааҕы физкультура институтугар үөрэнэр сылларыгар устудьуоннар сэбиэттэрин салайбыта. Тылын-өһүн ылыннарар, дьаһаллардаах буолара. Дэлэҕэ, норуот тапталлаах артыыһа, биир дойдулааҕа Бөгөдьөк киһитэ Аркадий Новиков “убайынан” билинэн Сэмэни эккирэтэ сылдьыа дуо. Кэлин, көрүдьүөстэнэрин сөбүлүүр Аркадий икки сыл аҕа буолара биллибитэ.

Ким да анаан-минээн үөрэппэтэҕин, сыһыарбатаҕын үрдүнэн, үлэ тэрилтэлэрин икки ардыларыгар оһуохайы таһаарыыга күрэхтэһиилэригэр, ыһыахтарга өрүүтүн кыттан кэллэ. Улууһун хамаандалара өрөспүүбүлүкэ күрэхтэһиилэригэр, спартакиадаларыгар, барыахтарын иннинэ алгыстыыр. “Олоҥхо ыһыахтарыгар” оһуохайдьыттар куонкурустарыгар 14 төгүл ситиһиилээхтик кытынна. “Түһүлгэлээх этээччи”, “Хомоҕой хоһоонноох этээччи” уо.д.а. анал бириистэр хаһаайыннара, “Саха Өрөспүүбүлүкэтин үтүөлээх этээччитэ” бэлиэлээх буола үүннэ-сайынна. Чурапчыттан иккис киһинэн “Ил Дархан 2023 с. стипендиата”. Жирков А.Н. илиититтэн Ил Түмэн Грамотатынан, кыһыл көмүс чаһыынан наҕараадаламмыта. Дьиэ малааһыннарын ыҥырыылаах алгысчыта. Дьоҥҥо үчүгэйи эрэ баҕарар девиһи тутуһар.

Лауреат аатын ылара сөп этэ

Айылҕаттан дэгиттэр сайдыылаах Сэмэн Сэмэнэбис Морфунов киһини сөхтөрөрө үгүс. Олоҕун аргыһа Ульяна Пантелеймоновна сааһын тухары аптека үлэһитэ, фармацевт. Саха Өрөспүүбүлүкэтин фармациятын уонна доруобуйатын харыстабылын туйгуна. “Гражданскай килбиэн” бэлиэ хаһаайката. Оҕунан ытыыга Манчаары спартакиадаларын икки төгүллээх абсолютнай чөмпүйүөҥкэтэ, Дальнай Восток, Сибиир чөмпүйүөҥкэтэ. ССРС “Урожайын” Киин Сэбиэтин хамаанданан бэһис миэстэлээх. Улуус, нэһилиэк бочуоттаах олохтооҕо.

Онон, Морфуновтар дьиэ-кэргэн оройуоннарын, нэһилиэктэрин бочуоттаах олохтоохторо. Спорт куттаах ыаллар. Оҕолор, сиэннэр үлэҕэ-үөрэххэ, олоххо ситиһиилэринэн үөрдэллэр. Саха тустуутун, тренерин, учууталын Дмитрий Петрович Коркины албан аатырдыбыт бөҕөс быһыытынан, икки төгүл Саха Өрөспүүбүлүкэтин физическэй культураҕа уонна спорка эйгэтигэр Д.П. Коркин аатынан Государственнай бириэмийэтигэр түһэриллибитэ эрээри кыалла илик. Хайаан даҕаны Лауреат үрдүк аатын ыларыгар эрэллээхпит.

Морфуновтары, чугас аймах-билэ дьоннорун, доҕотторун, үөлээннээхтэрин үүммүт Саҥа 2026 сылынан эҕэрдэлиибит, чэгиэн-чэбдик туругу, дьолу-соргуну баҕарабыт!

Баһылай Посельскай