Дьокуускай куорат дьаһалтата тугу үлэлээбитин, инники былааннарын баһылык Евгений Григорьев физкультура уонна спорт общественноһын иннигэр отчуота “Кыайыы 50 сыла” спорт Дыбарыаһыгар буолан ааста. Куорат Сахабыт сирин тэбэр сүрэҕэ, хорук тымыра. Хайдах-туох үлэлээн-хамсаан олороруттан барыбыт да дьылҕата тутулуктаах. Киин куораппытыгар ыалдьабыт. Киэн туттабыт. Ыраахпытыттан-чугаспытыттан тутулуга суох күннэтэ истэ-билэ олоробут.

Евгений Николаевич үгүс сүрүн хайысхаларынан киэҥ өрүттээх үлэлэр ыытыллыбыттарын сиһилии кэпсээтэ. Ол курдук, уулуссалар, массыына суола өрөмүөннэммиттэр, тротуардар, оҥоһуллубуттар, саҥа автобустар ылыллыбыттар, сылаас тохтобуллар оҥоһуллубуттар, дьон олорор дьиэлэрэ тутуллаллар, хаарбах дьиэттэн көһөрүү, ырааһырдыы, көҕөрдүү, олимпийскай чөмпүйүөн Р.М. Дмитриев сверэ тупсарыы, кэҥэтии үлэлэрэ ыытыллаллар. Үөрэхтээһин, доруобуйа харыстабылын салааларыгар хамсааһыннар бааллар.

Отчуот сүнньүнэн, ыйытыылар, чопчу этиилэр киирдилэр. Чуолаан, өрөспүүбүлүкэ спорка ветераннарын сэбиэтин бэрэссэдээтэлэ Гаврил Сивцев спорт тутууларыгар, спортивнай имбэнтээрдэринэн хааччыйыыга; 4 № оҕо спортоскуолатын дириэктэрэ Альберт Трофимов өрөмүөн үлэтигэр; спорт албан аатын музейын дириэктэрэ Михаил Друзьянов Поярков уулуссатын “Триумф” спорка уораҕайыгар диэри уларытан “Олимпиецтар” ааттарын иҥэрэргэ; кэрэ-бэлиэ үбүлүөйдээх түгэннэри дьоһуннук тэрийэн ыытыыны; өрөспүүбүлүкэ кырдьаҕастарын сэбиэтиттэн Иван Горохов суолу асфальтааһыны күүскэ ыытан, куораты тупсарыыга; спортоскуола тренерэ Константин Эйзнер уулуссаларга баскетбол балассааккаларын оҥортоон тэнитэргэ ыйытыыларын, этиилэрин туһаайдылар.

Физкультура уонна спорт эйгэтигэр хамсатыылаах дьаһаллар күүскэ ыытыллалларыгар тохтоон туран, киин куорат баһылыга физкультуранан уонна спордунан дьарыктанааччылар элбээн иһэллэрин, 192 700 тыһ. киһиэхэ тиэрдиллэн, 50 %-ны куоһарбытын; спорка аналлаах тутуулар хото ыытыллалларын, сүрүн болҕомто оҕо спортоскуолаларыгар, 8300 оҕо спордунан дьарыктанарын, 10 000 кирбиини куоһарар сорук туруоруллубутун, спорт саалалар баар буолууларыгар, оҕо-ыччат физкультуранан уонна спордунан дьарыктаныытыгар уурулларын; 17-с кварталга 5 № оҕо спортоскуолатын филиала үлэлиирин, Губина уулуссаҕа дзюдо, самбо саалата баарын; Хатаска, Ильменскэй уулуссаҕа, “Звезднай” микрооройуоҥҥа, Кангалаас бөһүөлэгэр, Маҕаҥҥа, “Звезднай мирооройуонугар оҕо спортоскуолалар, спортсаалалар тутуллубуттарын; эбии саҥа спортсаалалар бырайыактара оҥоһулла сылдьалларын; физкультура уонна спорт маассабаһа үрдүүрүн, марафону сүүрээччилэр кэккэлэрэ хаҥаан иһэрин, тыһыынчанан дьон уһуну сүүрэр, хайыһардыыр буолбуттарын; элбэх киһи катокка хатааһылыырын, фигурнай хаҥкылааһын тэнийэрин; орто уонна аҕам саастаахтар скандинавскай хаамыынан үлүһүйэллэрин, культура уонна сынньалаҥ пааркатыгар, “Күөх хонууга” Сайсары күөл тула хаамарга табыгастаах маршруттар баалларын; уулуссаларга тренажердардаах, воркаутунан дьарыктанарга табыгастаах, 70-н тахса спорт балаһааккалара туруоруллубуттарын; дьон, ыччат доруобуйа эйгэтигэр түмсэн, сиэрдээх өйүнэн-санаанан мустар буолбутун; Ил Дархан, “Биир ньыгыл” партия өйөбүллэринэн туһаналларын; спорт салаатыгар үбү-харчыны көрүү кээмэйэ улааппытын; чөл олоҕу тутуһаачччылар кэккэлэрэ хаҥаан иһэрин, арыгылааһын аччатылларын, буруйу оҥоруу ирээтэ аҕыйыырын тоһоҕолоон бэлиэтээтэ. Сыал-сорук оҕо спортоскуолаларын элбэтиигэ туһаайыллар. Баар спортоскуолаларга оҕолор босхо муниципальнай программанан дьарыктаналлар.

Көрдөрүүлэр тупсууларыгар куорат баһылыга Евгений Григорьев бэйэтэ спордунан утумнаахтык дьарыктанара тэрийэр-салайар эппиэттээх үлэтигэр улахан төһүүнэн буолар. Оҕо саастарыгар 1 № оҕо спорт оскуолатыгар үтүөлээх тренердэргэ Михаил Георгиевич Вальга, 4 № оҕо спорт оскуолатыгар Макчим Аммосович Купринявка боксанан дьарыктаммыт, Москваҕа студенныыр сылларыгар үрдүк үөрэх кыһаларын рингэлэригэр кыайыылары ситиспит, миэстэлэспит. Билигин Андрей Иванович инструктор-методистаах “Кинезис” физкультурнай-чэбдигирдэр кииҥҥэ эчэйиитин чөлүгэр түһэринэр. Марафонунан дьарыктанар, сүүрэр сыаллаах-соруктаах. Спорт куттаах, чөл олох аргыстаах эдэрдии эрчимнээх, өйүн-санаатын бүтүннүүтүн Дьокуускайбыт кэскиллээх сайдыытыгар аныы сылдьар баһылык. Баҕа санаата: “хас биирдииюит ис тутулбутун көрүнэн, өй-санаа, эт-хаан өттүнэн эргиччи сайдыылаах, бигэ, чөл туруктаах, сырдыкка, үрдүккэ тардыһыахтаахпыт”.

Баһылай Посельскай